Heimasíða Bókmenntaborgarinnar.

Bókmenntahefð Reykjavíkur

Í útnefningunni segir meðal annars að Reykjavík státi af framúrskarandi bókmenntahefð í formi ómetanlegra miðaldabókmennta sem varðveittar eru í borginni og eru Íslendingasögurnar, Eddukvæði og Íslendingabók nefndar sérstaklega. Þá segir að þessi rótgróna hefð sýni sig í varðveislu, miðlun, bókmenntakennslu og kynningu bókmennta nú.  Einnig er tekið til þess að svo fámenn borg sinni bókmenntum af jafn miklum krafti og raun ber vitni, með þátttöku og samvinnu ólíkra aðila sem koma að bókmenningu og miðlun bókmennta, svo sem útgefenda, bókasafna og rithöfunda.

Samvinna og viðburðir

Sem Bókmenntaborg UNESCO leggur Reykjavíkurborg áherslu á góða samvinnu við alla þá mörgu aðila sem koma að bókmenningu í borginni, því Bókmenntaborgin Reykjavík er fyrst og fremst sameign þeirra allra svo og íbúa borgarinnar.

Menningar- og ferðamálasvið Reykjavíkur hýsir verkefnið Reykjavík Bókmenntaborg UNESCO og er skrifstofa Bókmenntaborgarinnar á skrifstofu sviðsins á Vesturgötu 1.