Íslenskuverðlaun unga fólksins í Bókmenntaborginni Reykjavík er úthlutað árlega, á degi íslenskrar tungu, þann 16. nóvember. Verndari verðlaunanna er frú Vigdís Finnbogadóttir, fyrrverandi forseti Íslands.

Markmið þessara verðlauna er að auka áhuga æskufólks á íslenskri tungu og hvetja það til framfara í tjáningu talaðs og ritaðs máls. Verðlaunin verða veitt nemendum sem hafa tekið miklum framförum og/eða náð góðum árangri í íslensku, hvort heldur þeir hafa hana að móðurmáli eða læra hana sem annað tungumál.

Sérhver grunnskóli í Reykjavík getur tilnefnt þrjá nemendur/nemendahóp, einn á hverju skólastigi, til verðlaunanna og fá allir sem tilnefningu hljóta veglegan verðlaunagrip sem hannaður er af verðlaunahönnuðinum Ingibjörgu Hönnu Bjarnadóttur. Verðlaunagripurinn, Þrösturinn góði, er hvorttveggja í senn, veggskraut og bókageymsla.

Skólar geta t.d. tilnefnt þá sem sýnt hafa færni, frumleika eða sköpunargleði í að nota tungumálið sem samskiptatæki í hagnýtum eða listrænum tilgangi.

Íslenskuverðlaun reykvískra skólabarna voru veitt í fyrsta sinn haustið 2007 og hafa verið veitt árlega síðan. 
Sjá myndband frá veitingu verðlaunanna 2020 en þá var ekki hægt að afhenda verðlaunin í Norðurljósasal Hörpu vegna samkomutakmarkana. .