fimmtudagur, 6. maí 2021

Reykjavíkurborg auglýsir nú 477 sumarstörf fyrir 18 ára og eldri.

  • Miðborg Reykjavíkur. Ljósmynd Ragnar Th. Sigurðsson.

Þetta er til viðbótar við þau 994 störf, bæði sumarstörf og sumarafleysingar, sem voru auglýst í febrúar sl. Auk þess ákvað borgarráð að fjölga um 250 störf fyrir 17 ára einstaklinga. Sumarstörfin hjá Reykjavíkurborg í ár eru því tæplega 1700 talsins.

Sumarstörf fyrir 18 ára og eldri

Reykjavíkurborg auglýsir að þessu sinni margvísleg störf, fyrir 18 ára og eldri, sem styðja hefðbundna starfsemi borgarinnar auk starfa sem snúa að nýsköpun og skapandi greinum. Um er að ræða störf á Borgarbókasafni, á listasöfnum borgarinnar, í sundlaugum borgarinnar, í Fjölskyldu- og húsdýragarðinum, við umhirðu borgarlandsins, í frístundastarfi og fjölbreytt sumarstörf á velferðarsviði svo eitthvað sé nefnt. Öll þessi störf snerta líf borgarbúa með einum eða öðrum hætti og veita þessum hópi ungmenna tækifæri til að kynnast fjölbreyttri starfsemi Reykjavíkurborgar sem er stærsti vinnustaður landsins.

Umsækjendur þurfa að vera 18 ára eða eldri og stunda nám eða skráðir í nám næsta haust. Ráðningartímabilið er allt að tveir og hálfur mánuður.

Þessi aukning sumarstarfa er liður í aðgerðaráætlun Reykjavíkurborgar vegna Covid-19 og er unnin í samvinnu við ríkið.

Sumarstörf fyrir 18 ára og eldri